حیدرآباد میں گزشتہ پانچ گھنٹوں سے جاری تیز اور ہلکی بارش کے باعث شہر کی معمولاتِ زندگی بری طرح متاثر ہو گئی ہیں۔
ڈپٹی کمشنر زین العابدین میمن نے صورتحال کے پیش نظر منگل کے روز تمام سرکاری و نجی تعلیمی ادارے بند رکھنے کا اعلان کیا اور اس حوالے سے باقاعدہ نوٹیفکیشن بھی جاری کر دیا۔ ان کا کہنا ہے کہ یہ فیصلہ طلبہ کی حفاظت اور آمد و رفت کی مشکلات کو مدنظر رکھتے ہوئے کیا گیا ہے۔
حیدرآباد کے مختلف علاقوں میں بارش کے ساتھ بجلی کی فراہمی بھی معطل رہی۔ اگرچہ کئی علاقوں میں سپلائی بحال کر دی گئی ہے تاہم ہیرآباد اور پبلک ہیلتھ فیڈر گزشتہ رات آٹھ بجے سے بند ہیں، جس کے باعث شہریوں کو شدید پریشانی کا سامنا ہے۔
مزید برآں، مسلسل بارش کے باعث قاسم آباد سے گزرنے والا نالہ اوور فلو ہو گیا ہے جس کے نتیجے میں نسیم نگر چوک پر پانی سڑکوں پر پھیل گیا، جس نے ٹریفک کی روانی کو بھی متاثر کیا۔
