29 اگست تا 2 ستمبر کراچی کے علاوہ ملک بھر میں بارش کی پیشگوئی

اسلام آباد: محکمہ موسمیات نے 29 اگست سے 2 ستمبر تک کراچی کے علاوہ ملک بھر میں بارش کی پیش گوئی کی ہے۔

اسلام آباد سے جاری بیان کے مطابق ملک کے بالائی اور وسطی علاقوں میں 29 اگست سے 2 ستمبر تک بارش کا امکان ہے، شدید بارشوں کے باعث پہاڑی علاقوں میں لینڈ سلائیڈنگ کا خطرہ ہے۔ محکمہ موسمیات کے مطابق 29 اگست سے 2 ستمبر تک کشمیر کے مختلف علاقوں اور 2 ​​ستمبر سے 30 ستمبر تک گلگت بلتستان میں گرج چمک کے ساتھ بارش کا امکان ہے۔

اعلامیے کے مطابق 29 اگست سے یکم ستمبر تک خیبرپختونخوا کے مختلف علاقوں میں بارشوں کا امکان ہے جن میں چترال، دیر، سوات، کوہستان، مانسہرہ، ایبٹ آباد، نوشہرہ، کوہاٹ، کرک، پشاور، چارسدہ، مردان، صوابی، بنوں، لکی مروت، وزیرستان اور ڈی آئی خان شامل ہیں۔

محکمہ موسمیات کے اعلامیے کے مطابق 29 اگست سے 2 ستمبر تک اسلام آباد، راولپنڈی، مری، گلیات، گوجرانوالہ، لاہور، فیصل آباد، سیالکوٹ، نارووال، خوشاب، سرگودھا اور دیگر علاقوں میں بارش کا امکان ہے۔ موسلا دھار بارش سے پنجاب اور خیبرپختونخوا کے مختلف علاقوں میں ندیوں اور نہروں میں طغیانی آنے کا خدشہ ہے جب کہ اسلام آباد کے نشیبی علاقے زیر آب آ سکتے ہیں۔