ٹرمپ اور پیوٹن کا ٹیلی فونک رابطہ
ٹرمپ اور پیوٹن کا ٹیلی فونک رابطہ، اگلے ہفتے اعلیٰ سطح کے مذاکرات پر اتفاق
واشنگٹن
: امریکی صدر ڈونلڈ ٹرمپ نے بتایا ہے کہ ان کی روس کے صدر ولادیمیر پیوٹن سے ٹیلی فون پر نہایت مثبت اور نتیجہ خیز گفتگو ہوئی ہے۔
ٹرمپ کے مطابق، پیوٹن نے انہیں اور امریکہ کو مشرقِ وسطیٰ میں امن کے عظیم کارنامے پر مبارکباد دی، جسے انہوں نے صدیوں سے خواب قرار دیا۔
ٹرمپ نے ٹروتھ سوشل پر اپنی پوسٹ میں کہا کہ انہیں یقین ہے کہ مشرقِ وسطیٰ میں امن کی کامیابی روس اور یوکرین کے درمیان جاری جنگ کے خاتمے کی کوششوں میں مددگار ثابت ہوگی۔
صدر پیوٹن نے امریکی خاتونِ اول ملانیا ٹرمپ کی بچوں سے متعلق سرگرمیوں کو سراہا اور اس کے تسلسل کی امید ظاہر کی۔ دونوں رہنماؤں کے درمیان روس-امریکہ تجارت کے مستقبل پر بھی تفصیلی گفتگو ہوئی، جسے جنگ کے اختتام کے بعد مزید آگے بڑھانے پر اتفاق کیا گیا۔
گفتگو کے اختتام پر فیصلہ کیا گیا کہ آئندہ ہفتے دونوں ممالک کے اعلیٰ سطح کے مشیروں کی ملاقات ہوگی۔ امریکہ کی جانب سے ان مذاکرات کی قیادت وزیرِ خارجہ مارکو روبیو کریں گے۔ ملاقات کی جگہ بعد میں طے کی جائے گی۔
اس کے بعد ٹرمپ اور پیوٹن کی باضابطہ ملاقات بڈاپسٹ، ہنگری میں ہوگی، جہاں وہ یوکرین جنگ کے خاتمے کے امکانات پر بات چیت کریں گے۔
ٹرمپ نے مزید کہا کہ وہ کل یوکرین کے صدر ولادیمیر زیلنسکی سے وائٹ ہاؤس میں ملاقات کریں گے، جس میں پیوٹن سے ہونے والی گفتگو سمیت دیگر امور پر تبادلۂ خیال کیا جائے گا۔
