پنجاب: دفعہ 144, 7 یوم کی توسیع
محکمۂ داخلہ پنجاب نے صوبے میں دفعہ 144 میں 7 دن کی توسیع کر دی۔
پنجاب: دفعہ 144, 7 یوم کی توسیع
ترجمان محکمۂ داخلہ پنجاب کے مطابق اس دوران ہر قسم کے احتجاج، جلسے، جلوس، ریلیوں، دھرنوں، اجتماع پر پابندی ہو گی۔ محکمۂ داخلہ نے جمعہ 24 اکتوبر تک دفعہ 144 کے نفاذ میں 7 یوم کے لیے توسیع کا نوٹیفکیشن جاری کر دیا، عوامی آگاہی کے لیے دفعہ 144 کے نفاذ کی بڑے پیمانے پر تشہیر کی ہدایت کی گئی ہے۔
ترجمان محکمۂ داخلہ کا کہنا ہے کہ دفعہ 144 کے تحت 4 یا زائد افراد کے عوامی مقامات پر جمع ہونے پر مکمل پابندی ہو گی، پنجاب بھر میں ہر قسم کے اسلحے کی نمائش پر مکمل پابندی عائد کر دی گئی ہے۔
ترجمان کے مطابق صوبے میں دفعہ 144 کے تحت لاؤڈ سپیکر کے استعمال پر بھی مکمل پابندی ہے، اشتعال انگیز، نفرت آمیز یا فرقہ وارانہ مواد کی اشاعت و تقسیم پر مکمل پابندی ہو گی۔
کابینہ کمیٹی برائے امن و امان کے اجلاس میں دفعہ 144 کے نفاذ میں 7 یوم کے لیے توسیع کی سفارش کی گئی ہے، دفعہ 144 کے نفاذ میں توسیع کا فیصلہ امن و امان کے قیام، انسانی جانوں اور املاک کے تحفظ کے لیے کیا گیا ہے، پنجاب حکومت نے دہشت گردی اور امنِ عامہ کے خدشات کے پیشِ نظر احکامات جاری کیے۔
