جب مارچ کا فیصلہ کر لیا تو کوئی راستہ نہیں روک سکے گا، مولانا فضل الرحمان

پشاور میں اسرائیل مخالف کانفرنس سے خطاب میں مولانا فضل الرحمان نے کہا کہ مدارس رجسٹریشن کے معاملے پر اتحاد المدارس کا اجلاس بلا کر متفقہ لائحہ عمل دیں گے۔

سربراہ جے یو آئی نے کہا کہ حکومتی اتحادیوں کی رضامندی سے بل پاس ہوا، تحریک انصاف کو بھی بل پر اعتراض نہیں تھا لیکن ایوان صدر سے بل پر دستخط نہیں کیے جارہے، بل پر دستخط نہ کرنا بدنیتی یا دھوکے بازی ہے یا نہیں؟

مولانا فضل الرحمان نے کہا کہ ہم پاکستان کے تحفظ اور استحکام کی جنگ لڑ رہے ہیں۔ پاکستان اگر ریاست ہے تو عوام کی بنیاد پر ہے، پارلیمنٹ میں ہم چھوٹی سی پارلیمانی قوت ہیں، ہماری پارلیمانی قوت کو چھوٹا کیا گیا۔

انہوں نے کہا کہ پہلے 26ویں آئینی ترمیم ہم سے چپھائی گئی، دینی مدارس کے بل کا ڈرافٹ حکومت نے تیار کیا، بل اسمبلی میں آیا تو کچھ قوتوں نے اسے رکوا دیا،  یہ سمجھتے ہوں گے کہ مولوی تھک جائیں گے۔

مولانا فضل الرحمان نے کہا کہ امریکا اور مغربی دنیا انسانیت کے قاتل ہیں۔ ہم نے اس خطے میں انسانیت کو شعور دیا ہے، فلسطینیوں کے شانہ بشانہ کھڑے ہیں، جنگ عظیم اول میں مغربی دنیا نے کروڑوں انسانوں کا قتل عام کیا۔ افغانستان اور عرب دنیا کے مسلمانوں کا قتل عام کیا گیا، حکمرانوں میں فلسطینیوں کے ساتھ ڈٹ کر کھڑے ہونے کی جرات کیوں نہیں؟