تاجر مہنگائی اور بلوں سے پریشان
تاجر مہنگائی، بجلی اور گیس کے بڑھتے بلوں سے پریشان ہوگئے، حکومت سے فوری حل کا مطالبہ کردیا۔
تاجر مہنگائی اور بلوں سے پریشان
گیلپ پاکستان نے 5 سو سے زائد کاروباری شعبوں کی آراء پر مبنی نیا سروے جاری کیا، جس کے مطابق تاجر مہنگائی، بجلی اور گیس کے بڑھتے بلوں سے پریشانی ہیں۔ سروے میں 28 فیصد نے مہنگائی، 18 فیصد نے یوٹیلیٹی بلز میں اضافے کو اپنا سب سے بڑا مسئلہ قرار دیا۔
سروے میں 11فیصد نے بڑھتے ٹیکس، 6 فیصد نے سیاسی عدم استحکام کو اپنے کاروبار کےلیے خطر ہ قرار دیا جبکہ7 فیصد نے قوت خرید میں بہتری، 4 فیصد نے لوڈشیڈنگ اور 3 فیصد نے روپے کی قدر کنٹرول کرنے کا حکومت سے مطالبہ کیا۔
سروے میں کاروباری شعبے کے مسائل کے حل کےلیے حکومتی فیصلوں کو درست کہنے والے تاجروں کی شرح میں بھی اضافہ دیکھا گیا۔
گزشتہ سروے میں 6 فیصد جبکہ حالیہ سروے میں 17 فیصد نے کہا کہ حکومت درست فیصلے کر رہی ہے۔سروے میں رشوت ستانی میں بھی کمی نوٹ کی گئی، گزشتہ سروے میں 34 فیصد جبکہ حالیہ سروے میں 15 فیصد نے کاروبار چلانے کےلیے رشوت دینے کا کہا۔
کاروبار کی جگہ پر لوڈشیڈنگ کا سروے میں 47 فیصد تاجروں نے کہا جبکہ لوڈشیڈنگ نہ ہونے کا 53 فیصد نے بتایا۔
