شہر کے مختلف علاقوں میں بارش ، سڑکوں پر پھسلن

کراچی: خلیج کیمبے اور اس سے ملحقہ گجرات (انڈیا) پر موجود کم دباؤ کا علاقہ مغرب اور شمال مغرب کی طرف بڑھنے کے بعد محکمہ موسمیات نے سائیکلون کا دوسرا الرٹ جاری کر دیا۔

سسٹم کے زیر اثر شہر کراچی کے مختلف علاقوں صدر، شاہرہ فیصل، جناح اسپتال، شیر شاہ، بلدیہ، ماڑی پور اور ہاکس بے اور دیگر علاقوں میں  بارش  ہوئی، سڑکوں پر پھسلن ہو گئی۔

محکمہ موسمیات کے مطابق شہر کراچی سے تقریباً 340 کلومیٹر جنوب مشرق میں سوراشٹرا، گجرات کے قریب ہے، امکان ہے کہ یہ نظام مغرب اور جنوب مغرب کی طرف بڑھے گا جبکہ رات یا کل صبح تک خلیج کَچھ کے ساتھ شمال مشرقی بحیرہ عرب میں ابھرے گا۔

۔سازگار ماحولیاتی حالات، سمندر کی سطح کا درجہ حرارت، کم یا اعتدال پسند ونڈ شیئر اور بالائی سطح کے ڈائیورژن کی وجہ سے، کل تک سسٹم کے مزید شدت سے ڈپریشن میں جانے اور ابتدائی طور پر مغرب پھر جنوب مغرب کی سمت بڑھنے کا امکان ہے۔

سسٹم کے زیر اثر تھرپارکر، عمرکوٹ، سانگھڑ، میرپورخاص، بدین، شہید بینظیر آباد، نوشہروفیروز، حیدرآباد، جامشورو، ٹھٹھہ، سجاول، ٹنڈو محمد خان، ٹنڈو اللہ یار میں آندھی اور گرج چمک کے ساتھ ہلکی سے درمیانی شدت کی بارش کا امکان ہے۔

مٹیاری کے اضلاع اور کراچی ڈویژن میں آج اور کل بارش کی پیشگوئی کی گئی ہے۔

سمندری حالات 45 سے 55 کلو میٹر فی گھنٹہ کی رفتار سے چلنے والی ہواؤں کے ساتھ ناہموار اور بہت ناہموار رہنے کا امکان ہے۔ سندھ کے ماہی گیروں کو ہدایت کی گئی ہے کہ وہ 2 اکتوبر تک گہرے سمندر میں نہ جائیں۔

متازعہ ٹوئٹ کیس: ایمان مزاری اور ہادی علی چٹھہ پر فرد جرم عائد