بجلی کا ریٹ کم ہونے کا امکان نہیں: چیئرمین نیپرا
نیپرا کے چیئرمین نے کہا ہے کہ بجلی کا ریٹ کم ہونے کا امکان نہیں۔
بجلی کا ریٹ کم ہونے کا امکان نہیں: چیئرمین نیپرا
چیئرمین محمد ادریس کی زیر صدارت قومی اسمبلی قائمہ کمیٹی پاور کے ہونے والے اجلاس میں بجلی ٹیرف کی کارکردگی پر غور کیا گیا۔ رانا محمد حیات نے کہا کہ کیا آئندہ مالی سال بجلی ٹیرف میں مزید کمی ہو گی۔ صنعتی شعبے کو 30 فیصد ریلیف دیا گیا ہے۔ زرعی شعبے کو کوئی ریلیف نہیں دیا گیا؟
سیکریٹری پاور ڈویژن نے کہا کہ صنعتی شعبے کو ریلیف کراس سبسڈی ختم کرنے کے باعث حاصل ہوا۔ جامع منصوبہ بندی کی جا رہی ہے۔
بجلی کا محکمہ کام نہیں کرتا، گالیاں ہم کھاتے ہیں: جنید اکبر
جنید اکبر نے کہا کہ میں نے چار ماہ قبل آفر کی تھی کہ کنڈا اتروانے کے لیے خود جاؤں گا۔ تعاون کرنے کو تیار ہیں مگر ان سے لائن لاسز کم نہیں ہو رہے۔ لائن لاسز کم نہیں ہوتے اور صارف کو آٹھ آٹھ گھنٹے نہیں ملتی۔ کام یہ نہیں کرتے اور گالیاں ہم کھاتے ہیں۔
سی ای او پیسکو نے کہا کہ ان کے تعاون سے آئندہ ماہ سے بہتری آئی ہے۔ ہم ریلیف مالی سال کی بنیاد پر دیتے ہیں۔ وفاقی وزیرِ بجلی اویس لغاری نے کہا کہ ریلیف ماہانہ بنیاد پر دیا جائے۔ متعلقہ ایس ڈی او کی ڈیوٹی لگائیں اور ریلیف ماہانہ بنیادوں پر فراہم کریں۔
سیکریٹری پاور ڈویژن نے کہا کہ سابقہ فاٹا میں 2008ء سے گھریلو صارفین کی بلنگ نہیں ہو رہی۔ اگر الیکٹرسٹی فراہم کریں تو 20 سے 30 ارب روپے سالانہ کا نقصان ہوتا ہے۔ بجلی تو دستیاب ہے مگر پیسے ملیں گے تو دیں گے۔ ابھی سابقہ فاٹا کو صرف بنیادی ضروریات کے لیے کچھ گھنٹے بجلی دی جاتی ہے۔ فاٹا کے گھریلو صارفین کے واجبات وفاقی حکومت ادا کرتی ہے۔
