ایرانی صدر کا دورہؑ پاکستان
ایرانی صدر مسعود پزشکیان سرکاری دورے پر اسلام آباد پہنچ گئے، وزیراعظم شہباز شریف نے استقبال کیا، 21 توپوں کی سلامی دی گئی۔
ایرانی صدر کا دورہؑ پاکستان
ایرانی صدر کا دورہؑ پاکستان کے سلسلے میں پہلے لاہور پہنچے تو ایئرپورٹ پر نواز شریف اور مریم نواز نے ان کا استقبال کیا، مسعود پزشکیان اور نواز شریف کی ملاقات بھی ہوئی جس میں مریم نواز بھی شریک تھیں۔ مہمان صدر نے لاہور میں مزار اقبال پر بھی حاضری دی، فاتحہ خوانی کی، مہمانوں کی کتاب میں تاثرات درج کیے۔ ترجمان دفتر خارجہ کے مطابق ملاقات میں علاقائی استحکام، تجارت اور اقتصادی تعاون پر بات چیت کی گئی، پاک ایران تعلقات مزید مضبوط بنانے کا عزم بھی ظاہر کیا گیا۔
ایرانی صدر کے استقبال کے لیے علامہ اقبال انٹرنیشنل ایئرپورٹ پر بھرپور تیاری کی گئی تھی، ایئرپورٹ کو پاکستان اور ایران کے پرچموں سے سجایا گیا تھا، ایرانی صدر کے استقبال کے لیے ریڈ کارپٹ بھی بچھایا گیا تھا۔ 
ترجمان دفتر خارجہ کے مطابق ایرانی صدر اپنے قیام کے دوران صدر آصف زرداری سے ملاقات کریں گے۔ وزیراعظم شہباز شریف اور ایرانی صدر کے درمیان وفود کی سطح پر مذاکرات ہوں گے۔ ایرانی صدر نے پاکستان روانگی سے قبل میڈیا سے گفتگو کرتے ہوئے کہا تھا کہ دورہ پاکستان کا مقصد تجارتی اور اقتصادی تعلقات کو فروغ دینا ہے۔ ایرانی صدر مسعود پزشکیان کا کہنا تھا کہ دورے کے دوران سرحدی سلامتی اور علاقائی امن کے امور زیرِ بحث آئیں گے۔ سرحدی منڈیاں اور رابطے باہمی تعاون کی نئی راہیں کھول سکتے ہیں۔
ایرانی صدر کا کہنا تھا کہ وہ پاکستان اور چین کے ون بیلٹ ون روڈ منصوبے میں فعال شرکت کے خواہاں ہیں جس سے ایران کو یورپ سے جوڑنے کا موقع مل سکتا ہے۔
