ٹردے ٹردے
چاچا جی۔۔۔ایہہ تے میری جگہ اے ایتھے، تہاڈی جگہ کدرے ہور ہووے گی۔۔۔۔
ذرا مینوں اپنی ٹکٹ تے وکھاؤ۔۔۔۔
او ہو۔۔۔۔
چاچا جی تہاڈی سیٹ اگے والی بوگی اچ اے۔ تہاڈی تے میری سیٹ دا نمبر اکو ای اے پر بوگی نمبر وکھ اے۔جے تسیں آکھو تے میں تہاڈا سامان تہاڈے نال جا کے تہاڈی سیٹ تیکر آپڑاآواں۔ اینی دیر اِچ اک قلی کول آیا تے کہن لگا باؤ جی سامان میں نوں دیو میں چھڈ آنا۔ میں اوس چاچا جی کولوں دعاواں لینیاں سن ایس لئی میں سامان آپ ای چُک کے چھڈ آیا۔
اے گل بات لہور ٹیشن تے کھلوتی گڈی ”عوام ایکسپریس“ دی بوگی نمبر دس (۰۱) وچ میرے تے اوہ چاچا جی دے درمیان ہو رہی سی جیہڑے بھلیکھے نال میری بک ہوئی سیٹ تے آکے بیٹھ گئے سن جد کہ میری سیٹ دا نمبر تے چاچا جی ہوراں دی سیٹ دا نمبر وی اک سی صرف بوگی دا نمبر وکھو وکھ سی۔اوس چاچا جی نوں دوجی بوگی اچ اوہناں دی سیٹ تیکر اَپڑان اِچ میں مدد کیتی تے ڈھیر ساری دعاواں وی اپنے سفر شروع کرن توں پہلاں لے لئیاں۔ میں لہورتوں کراچی دے سفر تے روانہ ہون لئی عوام ایکسپریس تے اپنے نا ل نال اپنی دھی قراۃالعین، اپنی گھر والی تے اپنے کزن (چچیرے بھائی) علی افضل دی سیٹ وی بک کروا لئی سی۔لاہور ٹیشن جتھوں میں اپنا سفر شروع کردا پیا ساں اوہ ٹیشن تے نالے اوہ گڈی ”عوام ایکسپریس“ اپنی اک وکھری تاریخ رکھدے نیں۔لہور ٹیشن جیہڑا اپنے اندر بہت زیادہ تاریخ رکھدا اے اوہدی تاریخ کجھ اِنج اے۔ 1857 دی جنگ ٓزادی دے آخیر دے دناں اچ برطانوی حکومت نے برصغیر اچ لہورٹیشن بنان لئی سوچیا تے فروری 1859 ا چ لارڈ جان لارنس نے ایس ریلوے ٹیشن دی بنیاد رکھی۔ایس ٹیشن دا نقشہ برطانوی سول انجینئر ولیم برلٹن نے لکیریا۔ ٹھیکیدار میاں محمد سلطان چغتائی نے 5 لکھ روپے وچ ایس عمارت نوں اک سال دے عرصہ وچ مکمل کیتا۔لہور ٹیشن توں پہلی گڈی 10 اپریل 1862 نوں امرتسر لئی روانہ ہوئی۔ ٹیشن دی عمارت دی خاص گل اے وے اوس دور وچ ایس عمارت تے توپ دی گولہ باری وی اثر نہیں کردی سی۔1940 وچ جدوں قائد اعظم ؒ لہور آئے تے ایس ٹیشن تے ای اوہناں نوں شان دار آؤ جی آکھیا گیا۔ کافی ساریاں تعمیری تبدیلیاں دی وجہ کرکے ٹیشن دی اصل عمارت کا 20 توں 30 فیصد حصہ اپنی اصل حالت وچ نہیں رہیا۔لہور ٹیشن دے 12 پلیٹ فارم نیں تے ساڈی گڈی پلیٹ فام نمبر 5 تے لگی ہوئی سی۔پہلاں وی میں ذکر کر چکیاواں کہ جس گڈی وچ سفر ہونا سی اوہدا نام عوام ایکسپریس اے تے ایہہ گڈی وی لہور ٹیشن دے وانگ اپنی اک تاریخ رکھدی اے۔عوام ایکسپریس پاکستان ریلوے دے محکمے وچ شروع ہون والی پرانی گڈی اے،پرانی توں مراد ایہہ نیں جے کہ ایس گڈی دیاں بوگیاں پرانیاں نے بلکہ پرانی توں مرادایس گڈی دی تاریخ پرانی اے۔اے گڈی روزپشاور توں کراچی تیکر1721 کلومیٹر (1069 میل)دا سفر 33 گھنٹے تے 30 منٹاں وچ 56 ٹیشناں تے رک کے طے کردی اے،۔ایناں ای سفرکراچی توں پشاور واپس آون والی گڈی اینے ای وقت اچ کردی اے۔اک دن وچ دو گڈیاں چل دیاں نیں اک پشاور توں کراچی جنہوں 14 ڈاؤن آکھیا جاندا اے تے اک کراچی توں پشاور جنہوں 13 اَپ آکھدے نیں۔ گڈی دا ٹائم چھ وج کے پنتالیاں (6:45PM) دا سی پر گڈی چونکہ پشاور توں آئی سی تے اوہدے نال لہور ٹیشن توں وی کجھ بوگیاں لگنیاں سن۔ اوہ بوگیاں لگدیاں ہویاں تے باقی بوگیاں جیہڑیاں پشاور توں آیاں سن اوہناں دی پانی دیاں ٹینکیاں پانی نال بھریاں گیاں۔ ایس پاروں گڈی اپنے ٹائم توں ادھا گھنٹہ بعد ٹُری۔ اسیں ہون سفر دی دعا”سبحان الذی سخرلناھذاوما کنالہ مقرنین و انا الیہ ربنالمنقلبون“پڑھی۔ہن ساڈا سفر شروع ہو چکیا سی۔