فیصل واؤڈا کو قتل کی دھمکی کا معاملہ
گزشتہ روز سینیٹ کی قائمہ کمیٹی برائے خزانہ کا سلیم مانڈوی والا کی زیرِ صدارت اجلاس ہوا جس میں فیڈرل بورڈ آف ریونیو (ایف بی آر) کی جانب سے 1010 گاڑیوں کی خریداری کا معاملہ زیرِ بحث آیا۔
سینیٹر فیصل واؤڈا نے اجلاس میں بتایا کہ ایف بی آر کے 3 افسران نے مجھے جان سے مارنے کی دھمکیاں دی ہیں، اس معاملے پر تو کریمنل کارروائی بنتی ہے۔
اب اس معاملے پر ان لینڈ ریونیو سروس آفیسرز ایسوسی ایشن نے فیصل واؤڈا کے الزامات کی سختی سے تردید کرتے ہوئے کہا ہے کہ ان لینڈ ریونیو سروس افسران نے کوئی دھمکیاں نہیں دیں۔
ان لینڈ ریونیو سروس آفیسرز ایسوسی ایشن کے مطابق سرکاری گاڑیوں کی خریداری قواعد کے مطابق ہوئی، افسران کو بدنام کرنے کی کوشش ناقابلِ قبول ہے، فیصل واؤڈا الزامات کے ثبوت پیش کریں۔
ایسوسی ایشن کی جانب سے کہا گیا ہے کہ بے بنیاد بیانات افسران کے حوصلے پست کر رہے ہیں، اس سے ٹیکس وصولی کے عمل کو نقصان پہنچ سکتا ہے، افسران ایمانداری اور پیشہ ورانہ اصولوں پر کاربند ہیں۔
ان لینڈ ریونیو سروس آفیسرز ایسوسی ایشن کی جانب سے یہ بھی کہا گیا ہے کہ افسران کی عزت و وقار کا ہر حال میں دفاع کریں گے۔