عمران خان نے مروت کو ملاقات کیلئے بلا لیا
شیر افضل مروت کو پارٹی رہنماؤں نے ملاقات کے لیے عمران خان کا پیغام پہنچا دیا ہے۔ انہوں نے کہا کہ مجھے ممبر اسمبلی نے ابھی بتایا کہ عمران خان نے مجھے بلایا ہے۔ ملاقات کرکے شکوہ کروں گا کہ بغیر سنے مجھے کیوں نکالا؟ اس سے قبل یہ خبر سامنے آئی تھی کہ پی ٹی آئی کے پارلیمانی پارٹی ارکان نے شیر افضل مروت کے حق میں عمران خان کو پیغام بھجوانے کا فیصلہ کرلیا ہے۔ پی ٹی آئی کی پارلیمانی پارٹی اجلاس میں چیئرمین پی ٹی آئی بیرسٹر گوہر، زرتاج گل، جنید اکبر اور دیگر ارکان شریک ہوئے۔
اس دوران شیر افضل مروت جذباتی ہوگئے اور انہوں نے گفتگو میں استفسار کیا کہ مجھے بتایا جائے کہ مجھے کیوں نکالا؟ اس پر پارلیمانی پارٹی ارکان نے شیر افضل مروت کو نکالنے کے فیصلے کا دوبارہ جائزہ لینے کا مطالبہ کیا اور سوال اُٹھایا کہ ’ہم سب کو بتایا جائے مروت کو کیوں نکالا؟‘ اس دوران بیرسٹر گوہر نے کہا کہ یہ پارٹی کا اندرونی معاملہ ہے اسے اندرونی سطح پر حل کریں گے۔