آصف زرداری چینی صدر سے تبادلۂ خیال کے منتظر، آصف علی زرداری نے چین کے صدر شی جن پنگ کو لکھے گئے خط میں پاکستان اور چین کی آہنی دوستی مضبوط بنانے کے عزم کا اعادہ کیا۔
خط میں صدر آصف زرداری نے کہا ہے کہ بیجنگ میں چینی صدر سے تبادلہ خیال کا منتظر ہوں، چین سے دوطرفہ تعاون مضبوط اور دوستی آگے بڑھانے کے لیے تبادلہ خیال کا منتظر ہوں۔
آصف علی زرداری کا کہنا ہے کہ پاکستان ون چائنہ پالیسی کی حمایت جاری رکھے گا، ون چائنہ پالیسی پاکستان کی خارجہ پالیسی کا اہم حصہ ہے، دونوں ممالک کے درمیان سدا بہار اسٹریٹجک تعاون کی شراکت داری ہے۔
انہوں نے کہا کہ چین نے سال 2024ء میں مختلف شعبوں میں نمایاں پیشرفت کی۔
صدرِ مملکت نے خط میں پاکستان اور چین کے درمیان پائیدار اور مسلسل بڑھتی دوستی کو سراہا اور صدر شی جن پنگ کی صحت کے لیے نیک خواہشات کا اظہار کیا۔
آصف زرداری نے چینی عوام کی مسلسل ترقی اور خوشحالی کے لیے بھی نیک خواہشات کا اظہار کیا۔